مش كل مهندس لازم يبقى BIM Manager: التدرج الوظيفي في BIM والمسارات التانية
Hosam Elzohry مشترك فعلي ·
خليني أقول وجهة نظري، مع إن الـAI غيّر حاجات كتير في سوق العمل، خصوصًا في مجال الـDevelopment.
مش كل مهندس لازم يبقى BIM Manager، ومش كل مهندس أصلًا مناسب للإدارة. فيه أشخاص ممتازين فنيًا، لكن مش بالضرورة عندهم المهارات أو الاستعداد لقيادة فريق وإدارة أشخاص، وده مش عيب ولا يقلل من كفاءتهم.
خلينا نفترض إن 50 مهندس دخلوا شركة في نفس اليوم، هل منطقي إن الـ50 يترقوا ويبقوا BIM Managers؟ طبعًا مستحيل داخل نفس الهيكل التنظيمي! الشركة ممكن تحتاج BIM Manager واحد، أو 2 أو 3 حسب حجمها وعدد الأقسام والمشروعات، وفوقهم مدير للإدارة كلها.
طب باقي المهندسين مش هيتطوروا؟
بالعكس، فيه مسارات تانية مش بتعتمد أساسًا على إدارة الأشخاص، وإنما على المعرفة والخبرة الفنية والتخصص. زي مثلًا BIM Development & R&D (Research & Development).
ممكن مهندس صغير في السن، لكنه متميز في البرمجة وتطوير أدوات Revit والـAutomation، يحصل على مرتب أعلى من مهندس عنده 6 سنوات خبرة في قسم تاني. لأن المرتب مش مرتبط بالسن أو عدد سنوات الخبرة فقط، وإنما بقيمة المهارات اللي الشخص بيقدمها للشركة.
التدرج الوظيفي في BIM
ده مثال لأحد أشكال التدرج الوظيفي، من المستوى المبتدئ إلى المناصب العليا:
- Junior BIM Engineer / Modeler — من 0 إلى سنتين.
- BIM Engineer / Modeler — من سنة إلى 4 سنوات.
- Senior BIM Engineer / Specialist — من 3 إلى 7 سنوات.
- BIM Coordinator — من 4 إلى 8 سنوات.
- BIM Lead / BIM Coordinator Lead — من 5 إلى 10 سنوات.
- BIM Manager — من 7 إلى 12 سنة.
- Head of BIM / Digital Delivery Director — من 10 سنوات فأكثر.
لاحظ إن فيه تداخل في سنوات الخبرة، وده مقصود. لأن ممكن مهندس يكون متميز ويتقدم بسرعة، ومهندس تاني يفضل في نفس المستوى مدة أطول، بل ممكن يتجاوز السنوات المذكورة.
كمان الترتيب ده مش قانون ثابت، ومش كل الوظائف دي لازم تكون موجودة في كل شركة، ولا كل مهندس لازم يمر بيها كلها. المسميات نفسها ممكن تختلف من شركة للتانية، ومن مصر للخليج لأمريكا. وعلامة (/) معناها إن المسمى اللي بعدها ممكن يكون بديلًا للمسمى اللي قبلها، مش وظيفة إضافية بالضرورة. وفي أمريكا مثلًا هنلاقي مسمى VDC – Virtual Design and Construction منتشرًا، خصوصًا في شركات المقاولات.
كمان التدرج مش لازم يكون إداري فقط؛ ممكن المهندس يتقدم في مسار فني متخصص أو في مسار Development، من غير ما يتحول إلى Manager.
والهيكل الوظيفي عمومًا بيكون أشبه بالهرم؛ عدد الوظائف القيادية في القمة أقل من عدد الوظائف التنفيذية في القاعدة. وطبعًا حجم الشركة بيفرق جدًا. ممكن شركة كبيرة يكون فيها كل المسميات دي، وشركة صغيرة تلاقي فيها شخص واحد بيقوم بأدوار متعددة، ويمكن يعمل الشاي كمان في وقت فراغه! 😂
يعني المبتدئ مايتعلمش BIM Management؟
هل معنى الكلام ده إن المهندس المبتدئ ما يتعلمش BIM Management أو مصطلحات زي BEP وEIR وOIR؟ بالتأكيد لا. لكن الفكرة في ترتيب الأولويات: الأهم فالمهم، حسب الوظيفة اللي بيستهدفها.
ممكن مهندس يقضي سنة كاملة يدرس مصطلحات وإدارة BIM، وبعدها يدخل شركة ويلاقي نفسه قاعد على Revit، وكل المطلوب منه جزء محدد من الموديل، وعمره ما هيكتب BEP أو يتعامل مباشرة مع EIR أو OIR. ممكن يلاقي ورقة ملزوقة على يمينه فيها المطلوب منه، وينفذه ويسلمه وخلاص! 😄
هو جزء من منظومة كبيرة، ومطلوب منه يؤدي دوره باحتراف، مش بالضرورة يكون مسؤولًا عن إدارة المنظومة كلها. وده لا يمنع إنه يفهم أساسياتها ويتوسع في معرفته مع الوقت.
الخلاصة
اتعلم وطوّر نفسك باستمرار، لكن اعرف أنت بتتعلم ليه، وإيه الوظيفة اللي بتستهدفها، وإيه المهارات المطلوبة فعلًا للوصول ليها. مش كل مهندس لازم يبقى BIM Manager، ومش كل ترقية لازم تكون ترقية إدارية. وممكن تكون قيمتك كمتخصص فني أو مطور أعلى من قيمة منصب إداري في شركة تانية.
ملحوظة أخيرة: حتى الشخص اللي بينظم لبسه وحاجاته في البيت بيمارس نوعًا من الـManagement بالمعنى العام! 😄 لكن إدارة نفسك وحاجاتك شيء، وإدارة فريق وشغل شركة شيء تاني.
والله أعلم.
